0
114

મુંબઈ:શરાબ ઉત્પાદક વિજય માલ્યાએ એસબીઆઇની આગેવાની હેઠળ બેન્કોના કોન્સોર્ટિયમ પાસેથી રૂ.6,000 કરોડની લોન મેળવી હતી તેમાંથી મોટા ભાગની લોનનું મની લોન્ડરિંગ કર્યું છે. આ કેસની તપાસ કરનાર સીબીઆઇ અને ઇડીના અધિકારીઓએ આમ જણાવ્યું હતું. લંડન ભાગી ગયેલા બિઝનેસમેન સામે ટૂંક સમયમાં નવી ચાર્જશીટ દાખલ કરવામાં આવશે.


તપાસ કરનાર અધિકારીઓએ જણાવ્યું કે આ ફંડ જુદા જુદા સાત દેશોમાં આવેલી શેલ કંપનીઓમાં ડાઇવર્ટ કરવામાં આવ્યું હોવાની શક્યતા છે. ચાલુ વર્ષે બંને તપાસકર્તા એજન્સીઓએ આઇડીબીઆઇની રૂ.900 કરોડની લોનના કેસમાં પ્રથમ ચાર્જ શીટ દાખલ કરી હતી. હવે નવો અને મોટો કેસ બહાર આવ્યો હોવાથી માલ્યાનું પ્રત્યાર્પણ કરવામાં મદદ મળશે. આ કેસ અત્યારે વેસ્ટમિન્સ્ટર કોર્ટમાં ચાલુ છે.

હિલચાલથી વાકેફ એક વરિષ્ઠ અધિકારીએ કહ્યું કે, અમે અમે બીજી પ્રોસિક્યુશન ફરિયાદ દાખલ કરવાની તૈયારીમાં છીએ. અમારી તપાસમાં જાણવા મળ્યું છે કે કિંગફિશર એરલાઇન્સને બેન્કો દ્વારા અપાયેલી લોન માલ્યા અને તેના સંલગ્ન લોકોએ શેલ કંપનીઓમાં ટ્રાન્સફર કરી હતી. અમે આ વિશે પત્રો લખ્યા છે અને યુએસ, યુકે, ફ્રાન્સ અને આયર્લેન્ડ ટૂંક સમયમાં તેનો જવાબ આપશે તેવી આશા રાખીએ છીએ.

આ લખાય છે ત્યાં સુધી બંને એજન્સીઓએ ઇટીના ઇમેઇલનો જવાબ આપ્યો ન હતો. ફંડ ડાઇવર્ઝનના કેસમાં માલ્યાને ભારત પરત આવવા જણાવાયું હોવા છતાં માલ્યા ભારત આવ્યો નથી. નવા મની લોન્ડરિંગ કેસમાં રૂ.6,027કરોડની લોનનો સમાવેશ થાય છે જે એસબીઆઇની આગેવાની હેઠળ ડઝનથી વધુ બેન્કો પાસેથી લેવામાં આવી હતી.

આ લોન 2005 અને 2010 વચ્ચે માલ્યાની માલિકીની કિંગફિશર એરલાઇન્સ દ્વારા લેવામાં આવી હતી. લોનની રકમ અને વ્યાજ મળીને સંયુક્ત રીતે રૂ.9,000 કરોડ થાય છે. નોન-પેમેન્ટ અને ગુનાઇત ષડયંત્ર અંગે ગયા વર્ષે કેસ દાખલ થયો હતો.

માલ્યાને ભાગેડુ જાહેર કરાયા છે અને આઇડીબીઆઇ બેન્ક દ્વારા લોન છેતરપિંડીનો કેસ કરાયો છે. વિવિધ એજન્સીઓ તેમને લંડનથી પ્રત્યાર્પણ દ્વારા પરત લાવવા પ્રયાસ કરી રહી છે. મે મહિનામાં દાખલ થયેલી ચાર્જશીટમાં તપાસકર્તા એજન્સીઓએ દાવો કર્યો હતો કે આઇડીબીઆઇ બેન્ક પાસેથી જે લોન લીધી હતી તેમાંથી અડધાથી વધારે લોનનું મની લોન્ડરિંગ કરાયું છે.

આ નાણાં જે શેલ કંપનીઓમાં ટ્રાન્સફર કરવામાં આવ્યા હતા તેમાં ડિરેક્ટર્સ તરીકે માલ્યાનો પર્સનલ સ્ટાફ, નિવૃત્ત અધિકારીઓ અથવા થર્ડ પર્સન હતા. સીબીઆઇએ એક મહિનાની અંદર મની લોન્ડરિંગનો નવો કેસ દાખલ કરે તેવી શક્યતા છે જેમાં માલ્યાના તમામ ફંડ ડાઇવર્ઝનની વિગત પૂરી પાડવામાં આવશે તેમ અધિકારીએ કહ્યું હતું.

LEAVE A REPLY