0
88

નવી દિલ્હી: ભારતીય એરલાઈન્સે GST માળખા હેઠળ રાહતની માંગણી કરી છે. નવા ટેક્સ કાયદાને કારણે પહેલેથી જ મુશ્કેલીનો સામનો કરી રહેલા ઉડ્ડયન ઉદ્યોગના ખર્ચમાં નોંધપાત્ર વધારો થયો છે અને તેનાથી ભાડાં વધી શકે છે એવી દલીલ એરલાઈન કંપનીઓએ કરી છે.


એક સીનિયર એરલાઈન એક્ઝિક્યુટિવે જણાવ્યું છે કે, GST હેઠળના નવા વેરાને લીધે અમારા પર રૂ.4,750 કરોડનો બોજ પડશે, જેથી અમારો ઓપરેશન્સ ખર્ચ વધશે અને પરિણામે એરલાઇન ઉદ્યોગ માંદો પડવાની સંભાવના ઊભી થઈ છે. નવા વેરાઓને કારણે એરલાઈન્સ જે નફો કમાઈ રહી છે તે ગુમાવવાનો વારો આ‌વી શકે છે.

ભારતની ત્રણ લિસ્ટેડ એરલાઈન ઇન્ડિગો, જેટ એરવેઝ અને સ્પાઇસજેટે માર્ચ-’17માં પૂરા થયેલા વર્ષમાં સંયુક્ત રીતે રૂ.2,479 કરોડનો નફો નોંધાવ્યો હતો. નોન-લિસ્ટેડ એરલાઈન્સ પૈકીની એકમાત્ર ગોએર નફો કરતી એરલાઈન છે જ્યારે એર ઇન્ડિયા, વિસ્તારા અને એર એશિયા ઇન્ડિયા ખોટ કરે છે.

GST હેઠળ, સર્વિસ પછી વિમાનના એન્જિન અને પાર્ટ્સની રિ-ઇમ્પોર્ટ પર ટેક્સ લગાવવામાં આવ્યો છે, જેના કારણે ઉડ્ડયન ઉદ્યોગે દર વર્ષે રૂ.2,000 કરોડનો વધારાનો ખર્ચ કરવો પડશે.

એક્ઝિક્યુટિવે ઉમેર્યું હતું કે, ભારતમાં એન્જિન રિપેર શોપ ન હોવાથી વિમાનના એન્જિનને રિપેર કરાવવા માટે બહાર મોકલવાની ફરજ પડે છે. વેરામાં વધારો થવાથી ઘણી એરલાઈન્સના એન્જિન્સ કસ્ટમ્સ પાસે ફસાયેલા છે, જેથી ઉદ્યોગના ઓપરેશન્સ પર પણ અસર પડી રહી છે.

વિમાનના પાર્ટ્સની આયાત પર 28 ટકા જેટલો ઊંચો ઇન્ટિગ્રેટેડ GST (IGST) લાગે છે તેમજ કેપ્ટિવ યુઝ માટે પાર્ટ્સની ઇન્ટરસ્ટેટ ટ્રાન્સફર પણ ટેક્સના દાયરામાં આવે છે. અન્ય એક એરલાઈનના એક્ઝિક્યુટિવે જણાવ્યું હતું કે, આ વેરાઓથી ભારત વૈશ્વિક સ્તરે બિનસ્પર્ધાત્મક બનશે, પરિણામે વિદેશની એરલાઈન્સને અમારી સામે સ્પર્ધા કરવામાં વધારે ફાયદો થશે. વિશ્લેષકો જણાવે છે કે, જો એરલાઈન્સને રાહત નહીં મળે તો હવાઇભાડાં વધી શકે છે, જેથી પેસેન્જર ગ્રોથમાં ઘટાડો પણ થઈ શકે છે.

સેન્ટર ફોર એશિયા પેસિફિક એવિએશન (CAPA)ના ભારત ખાતે ડિરેક્ટર અને CEO કપિલ કૌલ કહે છે કે, એરલાઈન્સે રાહતની માંગણી કરી છે તે તાર્કિક છે અને આગામી 12 મહિનામાં અમારા અંદાજ કરતાં પણ વધારે અસર પડી શકે છે. GST કાઉન્સિલ જ્યારે પણ જરૂર પડે ત્યારે ફેરફાર કરવા માટે મુક્ત મન ધરાવે છે અને અમને આશા છે કે, આ પ્રશ્નનું સુખદ નિરાકરણ આવશે

LEAVE A REPLY